راولپنڈی۔8اکتوبر(اے پی پی)ضلع اورکزئی اچ شہید تھیوݨ آلے لیفٹیننٹ کرنل جنید طارق اتے میجر طیب راحت دی نماز جنازہ ادا کر ݙتی ڳئی اے۔ پاک فوج دے شعبہ تعلقات عامہ آئی ایس پی آر توں جاری بیان موجب لیفٹیننٹ کرنل جنید طارق (عمر: 39 سال، رہائشی ضلع راولپنڈی) اتے میجر طیب راحت (عمر: 33 سال، رہائشی ضلع راولپنڈی) دی نماز جنازہ چکلالہ گیریژن، راولپنڈی اچ ادا کرݙتی ڳئی اے، اے انہاں 11 بہادر جواناں اچ شامل ہن جنہاں ضلع اورکزئی اچ انٹیلی جنس دی بنیاد تے بھارتی حمایت یافتہ خوارج دے خلاف آپریشن دے دوران جام شہادت نوش کیتا۔ وزیراعظم محمد شہباز شریف، چیف آف آرمی سٹاف فیلڈ مارشل سید عاصم منیر، وفاقی وزراء، فوجی و سِول افسران اتے عوام نماز جنازہ اچ شرکت کیتی۔ وزیراعظم سانحہ اورکزئی دے 11 شہداء کوں خراج عقیدت پیش کریندے ایں عزم دا اظہار کیتا جو پاکستانی قوم دہشت گردی دی ایں لعنت دے خلاف پرعزم اتے ثابت قدم اے اتے شہداء دیاں لازوال قربانیاں ہر قیمت تے مادر وطن دے دفاع کیتے قوم دے غیر متزلزل عزم دی کوں یاد ݙویندن ۔ شہداء کوں پورے فوجی اعزاز نال آبائی علاقیں اچ سپرد خاک کیتا ویسی۔
