اسلام آباد۔15اگست (اے پی پی) وفاقی وزیر خزانہ و محصولات سینیٹر محمد اورنگزیب نال امریکی سفارت خانے دی ناظم الامور نٹالی بیکر وزارتِ خزانہ اچ ملاقات کیتی۔ ملاقات اچ آپسی دلچسپی دے امور، خاص طور تے ݙو پاسہ تجارت، کاروبار اتے پاکستان اچ امریکی سرمایہ کاری اچ ودھارے دے موقعیں تے ڳالھ مہاڑ کیتی ڳئی۔ وفاقی وزیر خزانہ آکھیے جو پاکستان دی معیشت کامیابی دے پاسے دا رُخ موڑ ڳھدے اتے موڈیز دی اڄوکی اپ گریڈنگ جیں ترائے وݙیاں بین الاقوامی ریٹنگ ایجنسیاں دی پاکستان دی معاشی کارکردگی تے مثبت رائے کوں ہک ڄاہ کرݙتے، واضح ثبوت اے جو حکومت دے اوکھے مگر ضروری اصلاحاتی اقدامات مثبت نتیجے ݙیندے پئن۔ انہاں پاکستان دیاں جرأت مندانہ اتے ضروری ٹیرف اصلاحات کوں واضح کیتا جو تجارت کوں آزاد کرݨ اتے برآمدات تے مبنی ترقی دے پاسے ملک کوں ونڄݨ سانڳے کیتیاں ڳئن۔ سینیٹر محمد اورنگزیب امریکہ ولوں پاکستان کوں جاری اقتصادی اتے ترقیاتی تعاون تے شکریہ ادا کیتا اتے واشنگٹن ڈی سی دے آپݨے اڄوکے دورے دا ذکر کیتا جتھاں انہاں دی امریکی وزیر تجارت ہاورڈ لٹ نک اتے امریکی تجارتی نمائندہ سفیر جیمیسن گریئر نال ملاقاتاں تھئن تاں جو ݙوہیں ملکاں وچال تجارتی معاہدے کوں حتمی شکل ݙتی ونڄ سڳے۔ وزیر خزانہ زور ݙتا جو اے معاہدہ توانائی، معدنیات، آئی ٹی، کرپٹو کرنسی اتے ݙوجھے شعبیں اچ معاشی تعاون دے ہک نویں دور دا آغاز کریسی جیں نال مارکیٹ تئیں رسائی ودھسی، سرمایہ کاری اچ ودھارا تھیسی اتے آپسی دلچسپی دے شعبیں اچ تعاون ودھسی۔ انہاں امید ظاہر کیتی جو اے معاہدہ امریکی سرمایہ کاری کوں پاکستان دے انفراسٹرکچر، ترقیاتی منصوبیں، ڈیجیٹل اتے مائننگ سیکٹرز دے پاسے توجہ ݙیسی جیڑھا عملی اقدامات اتے پیش رفت کیتے تیار ہن۔ نٹالی بیکر آکھیے جو اے تجارتی معاہدہ پاکستان اتے امریکہ ݙوہیں کیتے ݙو پاسہ تجارت کوں ودھاوݨ دا ہک اہم موقع اے۔ انہاں ݙسیا جو امریکی کمپنیاں پاکستان اچ سرمایہ کاری اتے کاروباری موقعیں خاص طور تے سپلائی چین، پیداوار، پروجیکٹ مینجمنٹ، توانائی، قیمتی معدنیات، مائننگ اتے تیل دی تلاش دے شعبیں اچ دلچسپی گھندیاں پئن۔ ݙوہیں فریقین ایں ڳالھ کوں دوہرائے جو او پکے تعاون دے ذریعے انہاں منصوبیں کوں اڳوں ودھیسن تاں جو آپسی فیدے دے نتیجے حاصل کیتے ونڄ سڳن اتے ݙوہیں ملکاں دے وچال تجارتی و اقتصادی تعلقات کوں مزید تکڑا کیتا ونڄ سڳے
.jpg)
